ಪ್ರಜ್ವಲ್ ರೇವಣ್ಣ ಕೇಸ್: ಎಲ್ಲವೂ ಅಶ್ಲೀಲವಾಗಿವೆ; ವಶಕ್ಕೆ ಪಡೆದೆಲ್ಲಾ 15000 ಫೋಟೋ, 2000 ವಿಡಿಯೋ ನೀಡಲ್ಲ- ಹೈಕೋರ್ಟ್
ಬೆಂಗಳೂರು: ಕಾರು ಚಾಲಕನ ಮೊಬೈಲ್ನಿಂದ ವಶಕ್ಕೆ ಪಡೆದ ಫೋಟೋ, ವಿಡಿಯೋ ಎಲ್ಲವೂ ಅಶ್ಲೀಲವಾಗಿದೆ. ಅಶ್ಲೀಲತೆಗೆ ಒಂದು ಮಿತಿ ಇರಬೇಕು. ಪ್ರಜ್ವಲ್ ರೇವಣ್ಣ ಎಂದ ಮಾತ್ರಕ್ಕೆ ಕಾನೂನು ಬದಲಾಗಲ್ಲ ಎಂದು ಕರ್ನಾಟಕ ಹೈಕೋರ್ಟ್ ಹೇಳಿದೆ. ಈ ಮೂಲಕ ಕಾರು ಚಾಲಕನಿಂದ ವಶಕ್ಕೆ ಪಡೆದ ಎಲ್ಲಾ 15000 ಫೋಟೋ, 2000 ವಿಡಿಯೋ ಒದಗಿಸಲು ಆಗಲ್ಲ ಎಂದು ಹೈಕೋರ್ಟ್ ನಿರಾಕರಣೆ ಮಾಡಿದೆ. ತನ್ನ ಕಾರು ಚಾಲಕನ ಫೋನ್ನಿಂದ ಪಡೆದುಕೊಂಡಿರುವ ಫೋಟೋಗಳು ಮತ್ತು ಎಲ್ಲಾ ವಿಡಿಯೋಗಳನ್ನು ಒದಗಿಸುವಂತೆ ಪ್ರಾಸಿಕ್ಯೂಷನ್ಗೆ ನಿರ್ದೇಶಿಸಬೇಕೆಂದು ಕೋರಿ ಪ್ರಜ್ವಲ್ ರೇವಣ್ಣ ಸಲ್ಲಿಸಿದ್ದ ಕ್ರಿಮಿನಲ್ ಅರ್ಜಿಯನ್ನು ನ್ಯಾಯಮೂರ್ತಿ ಎಂ.ನಾಗಪ್ರಸನ್ನ ಅವರ ಏಕ ಸದಸ್ಯ ಪೀಠ ಗುರುವಾರ ವಿಚಾರಣೆ ನಡೆಸಿತು.
ಪ್ರಜ್ವಲ್ ರೇವಣ್ಣ ಪರ ವಕೀಲ ಜಿ ಅರುಣ್ ವಾದ ಮಂಡನೆ ಮಾಡಿದರು.ವಿಚಾರಣೆ ಆರಂಭದಲ್ಲಿ,” ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಹೋಗಿರುವ ಫೋನ್ನಲ್ಲಿನ ದಾಖಲೆಗಳನ್ನು ನೀಡಲು ಸಮಸ್ಯೆ ಏನು? ” ಎಂದು ಸರ್ಕಾರಿ ವಕೀಲ ಎಎಸ್ಪಿಪಿ ಜಗದೀಶ್ ಅವರನ್ನು ಹೈಕೋರ್ಟ್ ಪ್ರಶ್ನೆ ಮಾಡಿತು.” ಹಾಲಿ ಪ್ರಕರಣಕ್ಕೆ ಸಂಬಂಧಿಸಿದ ವಿಡಿಯೊ ಮತ್ತು ಚಿತ್ರಗಳನ್ನು ಒದಗಿಸಲಾಗಿದೆ. ವಿಚಾರಣೆಯನ್ನು ವಿಳಂಬಿಸುವ ಉದ್ದೇಶದಿಂದ ಈ ಅರ್ಜಿ ಸಲ್ಲಿಸಿದ್ದಾರೆ. ವಿಚಾರಣಾಧೀನ ನ್ಯಾಯಾಲಯದಲ್ಲೂ ಸಿಡಿಆರ್ ಕೋರಿ ಅರ್ಜಿ ಸಲ್ಲಿಸಿದ್ದಾರೆ. ಎಲ್ಲವನ್ನೂ ಒದಗಿಸಲಾಗಿದೆ ” ಎಂದು ಜಗದೀಶ್ ಉತ್ತರಿಸಿದರು.
ಎಲ್ಲವೂ ಅಶ್ಲೀಲವಾಗಿವೆ.
ಈ ಪ್ರಕರಣಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಮಾತ್ರ ನೀವು ಕೇಳಬಹುದು. ಎಲ್ಲವನ್ನೂ ಕೇಳುವಂತಿಲ್ಲ. ಇತರೆ ಮಹಿಳೆಯರ ಖಾಸಗಿತನ ಉಲ್ಲಂಘಿಸುವ ದಾಖಲೆಗಳು ನಿಮಗೆ ಏಕೆ ಬೇಕು? ಎಲ್ಲವೂ ಅಶ್ಲೀಲವಾಗಿದೆ. ಅಶ್ಲೀಲತೆಗೆ ಒಂದು ಮಿತಿ ಇರಬೇಕು ಎಂದು ಹೈಕೋರ್ಟ್ ಪೀಠವು ಪ್ರಶ್ನೆ ಮಾಡಿತು. ಮುಂದುವರೆದು, ಪ್ರಜ್ವಲ್ ರೇವಣ್ಣ ಪರ ವಕೀಲ ಅರುಣ್ ಅವರು, ” ಪ್ರಜ್ವಲ್ ಮಾಜಿ ಕಾರು ಚಾಲಕನ ಮೊಬೈಲ್ ಫೋನ್ ಜಪ್ತಿಗೆ ಸಂಬಂಧಿಸಿದ ವರದಿಯನ್ನು ನೀಡಲಾಗಿದೆ. ಮೊಬೈಲ್ ಫೋನ್ ಅನ್ನು ನಾವು ಪರಿಶೀಲಿಸಬೇಕಿದೆ ” ಎಂದು ಮನವಿ ಮಾಡಿದರು. ಪ್ರಜ್ವಲ್ ರೇವಣ್ಣ ಎಂದ ಮಾತ್ರ ಕಾನೂನು ಬದಲಾಗಲ್ಲ” ಈ ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲಾ ದಾಖಲೆಗಳನ್ನೂ ನಿಮಗೆ ಸಿಗುತ್ತವೆ.
ಪ್ರಕರಣಕ್ಕೆ ಸಂಬಂಧಿಸಿದ ಮಹಿಳೆಯರ ಫೋಟೊ/ವಿಡಿಯೊ ನೀಡುವ ಮೂಲಕ ಅವರ ಖಾಸಗಿತನ ಧಕ್ಕೆ ಮಾಡಲಾಗದು. ಪ್ರಜ್ವಲ್ ರೇವಣ್ಣ ಎಂದ ಮಾತ್ರಕ್ಕೆ ಕಾನೂನು ಬದಲಾಗದು” ಎಂದು ಹೈಕೋರ್ಟ್ ಹೇಳಿತು. ” ನ್ಯಾಯಾಲಯ ನಿರ್ದೇಶಿಸಿದ ದಾಖಲೆಯನ್ನು ನೀಡಲಾಗುವುದು. ನಮಗೆ ಯಾವುದೇ ಹಿಂಜರಿಕೆ ಇಲ್ಲ ” ಎಂದು ಸರ್ಕಾರಿ ವಕೀಲ ಜಗದೀಶ್ ಹೇಳಿದರು. ಈ ಮೂಲಕ ಅರ್ಜಿ ಇತ್ಯರ್ಥವಾಯಿತು.
